هرتلات آخر اليوم:
تهمة دس الدسائس وتعكير المزاج العالى
لما الدنيا يتقفل فى وشى وأحس إنى زهقان ومحتاج أفرفش
ما بلاقيش غير حاجتين
هما اللى بيخلونى أموت على نفسى من الضحك
سلسلة أفلام اللمبى
وأخبار سورية
سوريا أحيانا مسخرة ألعن من اللمبى
آخر أخبار دولة الصمود والتحدى
دولة أمة واحدة ذات رسالة شاردة
الجكم على معارض سورى بالسجن 3 سنوات
والمسجون أصلاً فى السجن
والتهمة:
نشر معلومات مضللة الغرض منها تقويض المعنويات العامة
أنا فى عرض المجمع اللغوى
عاوز أعرف إيه هيه "المعنويات العامة"
زى المراحيض العامة مثلاً
ولا بيوزعوها ببطاقة تموين
ولا إيه الموضوع
وعلى رأى اللمبى
محدش فاهم حاجة
والمسجون أصلاً فى السجن
السجن اللى لا فيه لا راديو ولا تليفزيون
ولا إنترنت ولا بلوجر ولا نيلة
الراجل معزول عن العالم
فى سجن سورى متخلف
إمال نشر المعلومات دى إزاى
على حبل الغسيل فى السجن مثلاً
بيقولك نشرها بين المساجين
ووطنى حبيبى الوطن الأكبر
واللى يحبنا ما يضربش نار
واللى حامل فى توأم بتبقا بطنها كبيرة
واللى عامل عملية تبقا ريحته بنج
وسلم لى على دولة الصمود والتحدى
التهمة اللى الراجل ده اتسجن بيها 12 سنة
أى والله 12 سنة سجن
هى تهمة:
دس الدسائس
يا صلاة النبى أحسن
ودس يدس فهو داسس
داسس بدوخة ونفسى هفانى على البطيخ
الله يخرب بيوتكم
وبيت اللى راشى الحى وخد ترخيص عشان يبنى جنب بيتكم
