Oh, what do you call it again: a movie! شخة خنزير هولندى

أولاً ده مش فيلم...دا شوية قص ولزق ممكن يعملهم أى عيل مالوش أصلاً أى علاقة بالسينما...ده كائن شاذ لا هو فيلم تسجيلى ولا روائى ولا فيلم أصلاً...
مش عارف ليه إحنا ليه لسه بنعمل للخنزير الهولندى قيمة وشيخ الأزهر اللى بيعتبر رمز إسلامي يتكلم عنه...ده شوية هرتله وصور متجمعة لا فيها فكر ولا رؤية وأحسن حاجه نعملها هو تجاهل الكلب اللى بيعوى ونقول لكل الخنازير : قل موتوا بغيظكم
14 دقيقة واحد حب فيهم يشتم الإسلام...طاب ما تسيبوه يشتم...وسيبوه خالص براحته..لإن النار لو مالقتش حاجة تكلها بتاكل نفسها
هنتظاهر ونجعر..هيقولوا عليه شهيد الحرية..وهنعمل دعاية لشخته ونسميها فيلم..ياجماعة خلينا أكبر من البقر الهولندى
إحنا حضارة 1400 سنة هيضرنا إيه لما خنزير هولندى يقول علينا متخلفين
كبر دماغك..وصدقنى كل اللى شافوا حتة البور بوينت دى اللى بيقولو عليها فيلم قالوا الموضع ما يستاهلش أساساً ان احنا نتكلم فيه
إتفرج وقولى إيه رأيك

أحنا اللى بنسب الرسول

أحنا اللى بنسب الرسول!
أيوه إحنا اللى بنسب الرسول مش الدنمارك ولا النرويج ولا حتى إسرائيل...إحنا اللى بتخلفنا ونظرتنا المحدودة للأشياء اللى بنسب الرسول وبنشهر بأشرف الخلق فى كل مكان...وقبل ما تقول إنى بحشش-وأنا حشاش ولا أنكر- لكن خليك معاي دقيقتين...إدينى مخك وسيبك من الحناجر اللى عمله تولول أربعة وعشرين ساعة على الرسول وهم اللى وكسونا ودنسوا إسم أشرف الخلق:
هديلك سيناريو: واحد رسام مغمور مالوش أى لازمة فى الحياة..عايش فى بلد مالهاش لازمة فى الحياة غير إنهم شوية جهلة بيحلبوا بقر وبيبيعوا جبنة!...المهم الرسام الغير مهم ده اتحذق وجاله إسهال من كتر الجبنة البيضة وشخ على ورقة رسمة مسيئة على النبى الكريم...والجريدة دى على أقصى حد بيقرأها عشر تلاف واحد...والصفحة اللى فيها الرسمة دى بيقراها قيمة ثلاثة آلاف من العشرة دول...والكاريكاتير ده..بيقراه حوالى ألف من التلاتة من العشرة...يعنى ألف واحد هيشوفوا رسمة مسيئة للنبى...أوكى..والموضوع خلص ونام ومات...ولا من شاف ولا من درى..
السيناريو التانى: نفس السيناريو بس زود عليه...شيخ فى مسجد فى الدنمارك ...كل شغلته فى الحياة إنه يصلى بالناس الجمعة وبقية الأسبوع فاضى ماورهوش شغلة عشان المسلمين فى الغرب شغالين ليل نهار ويدوب بيصلوا الجمعة بالعافية..الشيخ ده شاف الرسمة ولا حد قاله عليها لأن معظم شيوخنا أصلا لا يقرأون (الجرايد الكافرة) ومعظم شيوخ الغرب لا يفهمون ثقافة المجتمع اللى هما عايشين فيه وطول النهار بيتفرجوا على الجزيرة والعربية وقناة النيل للدرامل عشان يشوفوا تطورات مرض ماما نونة..
المهم الشيخ ده أعلنها نار وسنار وطلع يجرى يلف الدول العربية وكأنه بيجاهد فى سبيل الله ولا يحلوا الجهاد إلا فى الغرب اللى بيدفع بالدولار والدول العربية اللى بتدفع بالريال..إلا ما شفنا الشيخ ده رايح يعلم المسلمين فى كينيا ولا ساحل العاج ...المهم...الدنيا أتقلبت والمظاهرات قامت وهاتك يا مقاطعة وهاتك ياتكسير وحتى الحكومات ماشاء الله نزل عليها الإيمان فى يوم وليلة وسمحت للمظاهرات إنها تطلع وتكسر السفارات..وأهو الكل يسترزق..من أول الشيخ اللى بقاله قضية عالمية...لغاية الحكومات اللى عاوزة تصرف نظر الشعوب عن المصايب والإحتلال و التبعية والعمالة والتخلف..وكمان المغنين يعبوا شرايط وكلبات...وحتى الناس تطلع الكبت اللى هيا فيه وتنزل تصرخ فى الشوارع..يعنى الكل مستفيد..والكل هينام وضميره مرتاح لإنه عمل اللى عليه ووطلع (ميتينه) فى الجهاد...
إحنا اللى سبينا الرسول لما شهرنا صحيفة دنماركية حقيرة بغبائنا ومشاعرنا اللى مش فى محلها...إحنا اللى عملنا أحسن دعاية لرسام شخة درجة تالته وعملناه شهيد الحرية...إحنا اللى خلينا مهزئة النبى الكريم على كل محرك بحث عشان إحنا عالم نيجى فى الهايفة ونتصدر...
تمام بالظبط زى سلمان رشدى...كاتب تافه ومحدش كان يسمع عنه إلا لما إيران أهدرت دمه...وهاتك يا طباعة وهاتك يا تغطية إعلامية...والكتاب اللى كان اتباع منه خمسة ألاف نسخة...بشطارتنا أصبحت مبيعاته..خمسة مليون نسخة...عمرك شفت شعوب متخلفة بتدى أعدائها دعاية مجانية!..
عاوز تشوف شتيمة الرسول..أنا هاسمعك..فى القرآن...أيوه.. هتنح ليه...فى القران...تسمع شتيمة الرسول أكثر من مرة...القرآن سجل شتيمة الرسول فى آيات كثيرة..عشان يقول للمتخلفين أمثالنا..ميهمكمش لما يسبوا الرسول..دا شئ متوقع من الكفار...حصل وهيحصل وهيفضل يحصل طول مافيه حق وباطل..طب ما إحنا بنتعبد بقراية الآية اللى فيها وصف الكفار الرسول بإنه شاعر: أم يقولون شاعر نتربص به ريب المنون ، قل تربصوا فإني معكم من المتربصين.
وكمان قالوا مجنون: ويقولون أئنا لتاركوا ءالهتنا لشاعر مجنون
وكمان قالوا هو : وَمِنْهُمُ الَّذِينَ يُؤْذُونَ النَّبِيَّ وَيِقُولُونَ هُوَ أُذُنٌ قُلْ أُذُنُ خَيْرٍ لَّكُمْ يُؤْمِنُ بِاللّهِ وَيُؤْمِنُ لِلْمُؤْمِنِينَ وَرَحْمَةٌ لِّلَّذِينَ آمَنُواْ مِنكُمْ وَالَّذِينَ يُؤْذُونَ رَسُولَ اللّهِ لَهُمْ عَذَابٌ أَلِيمٌ
أكمل.لأ أسيبك أنت تسأل الشيخ حلاوة بتاع الجامع بتاعك ..لو أى حد ختم القران من الجلده للجلده هيعرف إن عشرات الآيات تسجل شتيمة الرسول.
عشرات الأمثلة والصفات موجودة فى القرآن وبنقراها كل يوم أطلقها الكفار على رسول الرحمة
طب لما القرآن سجل الكلام وموجود فى كتبنا ..ليه بتقوم قيامة الدنيا لما واحد تافه عمل ما أشار إليه القران..
المشكلة إن احنا أمة عاطفية ولا نفكر قبل أن نتحرك...يمكن مابنفكرش أساساً..دا اللى عنده مشكلة نفسية فى مصر بيقولوا عند فكر وكأن التفكير ده مرض نفسى..ياعم خلى البساط أحمدى وطالما الحكومة عاوزاناه نتظاهر ضد الدنمارك يالا بينا أهو ننفس عن نفسنا..وناخد ثواب الجهاد التظاهرى!

أنا نفسى شوفت استهزاء بالنبى فى برامج أمريكية كتيرة وعدت ومحدش خد باله منها...إنما لو كان الشيخ حلاوة خلص ماما نونة بدرى وشاف برنامج من البرامج دى كانت الدنيا اتقلبت ومقعدتش تانى..
وعلى سبيل المثال لا الحصر: على قناة أتش بى أوه: بيل ماهر كان وراه بانر مرسوم عليه الرسول صلى الله عليه وسلم لابس شورت وبيلعب ملاكمة مع المسيح..
وفى قناة الكوميدى سنترال: مانسيا قدم الرسل فى خناقة وكان منهم واحد بمثل الرسول..
عمرك سمعت عن أى واحدة من دول..طبعاً لأ..لأن شيخ حلاوة أمريكا كان لسه مخلصش ماما نونا نظراً لفرق التوقيت ...لإن أحسن حاجة تعملها لما الكلب يعوى...إنك تسيبه والقافلة تسير...إنما احنا فرملنا القافلة فى وسط الصحرا وقلنا لازم نتظاهر ونسمع كل القوافل إن الكلب ده عوى علينا!!
والرسول صلى الله عليه وسلم كان بيسمع شتيمته ومايردش لأن الرسول العظيم أعلى من إنه ينتصر لنفسة رب محمد هيرد على أعداء محمد بالقرآن..الرسول عمره ماحارب لإسمه ولا لسمعته حتى لما أتهموه فى شرفه فى حادثة الإفك...الرسول حارب عشان الأمة...عشان يحرر العبيد ...العبيد بأجسادهم..والعبيد بأفكارهم..
لو كنا هنتظاهر ونجعر يبقى أولى إن احنا نشوف خيبتنا الكبيرة..دا إحنا أمة عالة على كل الأمم..بنصنع لبان ومصاصات...وبنزرع كانتلوب بدل القمح..أحنا أمة عالة على العالم وحتى مشاكلنا الإجتماعية والسياسية مش لقيين لها حل...إحنا الأمة اللى الجمهوريات بتحول لملكيات..والفساد منتشر من الغفير لغاية الوزير...
إحنا أمة طوابير العيش و جلالة الملك وسمو الأمير..إحنا أمة الحدود والكفيل وتصاريح السفر..إحنا أمة أمن الدولة و المخابرات و أمن الرئاسة..أحنا أمة الوسايط والمحسوبيات ويا بخت من كان الوزير خاله...إحنا أمة عدم إحترام الوقت وصفر المونديال..إحنا أمة الفشل..والهزيمة النفسية والعسكرية..معلهش خلينى أقلب المواجع عشان نصحى من أفيون الشعوب اللى احنا بنتاعاطاه من صغيرنا لكبيرنا..
إحنا اللى بنسب الرسول لأن الرسول لو بعث تانى دلوقتى هيقولنا سحقا سحقاً...لا تملكون حتى قوت يومنا..ودولكم مصنفة من أفشل البلدان إدارياً فى العالم...وأراضيكم محتلة...وحكامك عملاء وخونة...ونصنكم جهلة ما بيعرفوش يفكوا الخط...
هو فيه إهانة للرسول أكتر من أننا ننسب الرسول لينا واحنا أفشل ناس فى العالم.
صلى الله عليك وسلم يارسول الله ...واعذرنى إنى بقول عن نفسى إنى من أتباعك! !

الحلم العربى يتحقق بجواز سفر أمريكى

الحلم العربى يتحقق بجواز سفر أمريكى

طلب منى الشغل إنى أحضر مؤتمر فى كاليفورنيا...قلت وماله...أهى فرصة الواحد يشوف أماكن وناس وجديدة...مرضتش اركب طيارة..ضربت فى دماغى فكرة مجنونة...قلت أما أجرب رحلة برية...من نيويورك لكاليفورنيا. ركبت الناقة وشرخت...بلاد تشيلنى وبلاد تحطنى...3 أيام على الطريق...سايق عربية متأجرة وهسلمها هناك وهأرجع بالطيارة...المسافة كانت ألفين وثمانمية ميل..يعنى أربعة آلاف وخمسمائة كيلو متر...يعنى نفس المسافة لو سقت من المغرب لغاية بغداد...

نفس المسافة لو ركبت عربية من المغرب وعديت على الجزائر وليبيا ومصر وفلسطين ولبنان والأردن وسرية وتوصل لبغداد..

نفس المسافة اللى تقطع فيها معظم الدول العربية سقتها هنا...ولاية تشيلنى وولاية تحطنى...ما بقفش إلا إنى أمون بنزين أو آكل أو فندق عشان أنام...ثلاثة أيام بلياليهم بالشكل ده...محدش وقفنى وقاللى (رخصك يا ولا) ولا حدود قالت لى فين جوازك ولا داخل الولاية دى تعمل إيه..

كل المسافة دى و النظام نفس النظام والعملة نفس العملة والتليفون على نفس الشبكة و الناس نفس الناس....

تخيل للحظة إنك تطلع الرحلة دى...تتعشى فى الجزائر وتفطر فى ليبيا و تتعشى فى مصر..وتعدى على كل البلاد دى...وقف التخيل ..لأنه مستحيل...لأنك هتلتطع على الحدود بالأيام على بوابة كل بلد لغاية ما يسألوا عنك ويتفضلوا عليك ويدوك فيزا...الحلم العربى بإنك تلف كل الدول العربية حلم مستحيل...خلوه مستحيل بمعاهدة سايكس بيكو واللى طار فيها واحد خنزير انجليزى بطيارة فوق دولتنا الواحدة ورسم الخنزير حدود خدناها إحنا كأنها قرآن لا يمكن تغييرة...

ليه فيه حدود بين مصر والسودان وإيه سوريا وإيه لبنان مش دى بلاد الشام وإيه ليبيا وإيه الجزائر...وإيه الحدود اللى عمله زى التشوهات فى جسم واحده كانت فى يوم بنت عفية وجميلة...

لى واحد زميلى دكتور فلسطينى...عيلته هاجرت الأردن واتعلم طب فى سوريا...يعنى كان لازم يتعامل مع أوسخ تلات حدود فى المنطقة: وكل كان كل مرة يزورأهله فى الأردن فى أجازة الكلية...كان الأمن الأردنى يستضيفه ليلة ولا ليلتين قبل ما يسمح له بالدخول...حكالى مرة إن ظابط كان بيحقق معاه ويطمن انه محصلوش غسيل مخ فى سوريا ولا آمن بشعار(أمة واحدة ذات رسالة خالدة) وسأله الظابط أوعى تكون من بتوع الوحدة العربية اللى بيقولوا هييجى يوم تفطر فى فلسطين و تتغدى فى الأردن وتتعشى فى مصر... إنت عارف إن ده مستحيل...فرد عليه زميلى الدكتور: ده ممكن جدا لو معاك جواز سفر أمريكانى!...

لو أنت أمريكانى الحدود تتفتح ادامك من غير فيزا...ولو انت عربى محتاج كفيل!!!

أيه اللى جمع الشامى على المغربى فى أمريكا وخلاهم يتحدوا...بيض على سود على عرب على هنود على مكسيكان...ديانات مختلفة وجنسيات مختلفة وبلد واحدة...

واحنا جنس واحد ودين واحد و بلاد مختلفة!

أنا مش ناصرى ولا بعثى و باكره سنسفيل جمال عبد الناصر..بس اللى خلى أوروبا تتوحد وأمريكا تتوحد ...هو يعنى احنا اللى شاخخ علينا الكلب؟

سنة سادسة غربة

سنة سادسة غربة

بقالي ست سنين بعيد عن مصر!..ست سنين مشفتش فيهم محل فول وطعمية ولا عديت على طابور عيش...ست سنين مشفتش حد (مدلدل) السبت وبينادى على بياع راكب حمار يديله كيلوبامية..مشفتش غسيل منشور على حبال البلكونات ولا أتوبسات حمره...ست سنين مشفتش شباب بيشيشوا وبيلعبوا (استميشن) على قهوة.مشفتش عيال مزوغة من المدرسة عشان يعاكسوا بنات دبلوم التجارة على الناصية..ست سنين مشفتش فيها القناة الأولى وتليفزيون صفوت الغير شريف...ست سنين ما وقفش بيا التاكسى ساعتين فى الشارع عشان فى مظاهرة فى جامعة عين شمس...ست سنين مفيش ظابط وقفنى فى لجنة وقالى رخصك .ست سنين متسرقس فيهم (الكوتشى) بتاعى وأنا بصلى فى عمرو بن العاص ورا محمد جبريل عشان أروح فى مترو الأنفاق لابش شبشب زنوبة...

ست سنين مسمعتش خناقة الآذان بين العشر (زوايا) اللى حوالين بيتى و لا (جعير) مكروفونات بياعين بطاطين المحلة على عربيات النص نقل...ست سنين مسمعتش صوت البياعين وهما بيدلوعوا الخضار (مجنونة يا قوطة وياعنب المزارع يا متغذى)!

ست سنين مقرتش أهرام الجمعة ولا جرايد الحكومة...ست سنين عدوا كأنهم ست ساعات...

كل مرة أفكر انزل أزور مصر ألاقى مليون شغلانه وشغلانه وأقول لنفسى ..خلاص إن شاء الله السنة الجاية..وكأن فى حاجة فى عقلى الباطن بتسوف وتسوف...

الحاجات اللى كانت خنقانى فى مصر هى نفسها الحاجات اللى وحشانى دلوقت..الحاجات اللى خلتنى أعد الأيام عشان أهج من البلد هى نفسها الحاجات اللى بفتكرها دلوقت واضحك..اضحك بجد..اضحك ضحكة (عميقة) من جوه..ضحكة متضحكتهاش من ست سنين....مش عارف هل لإنى كبرت ولا لإنى اتطحنت فى أمريكا وعرفت إن فى حاجات فى الدنيا أهم من الشوارع النضيفة والحياة المتزوقة..

الحياة فى أمريكا زى المانيكان اللى فى البترينة..حلوة ومتزوقه بس ما فيهاش روح...أكلة جميلة من غير ملح...جنة من غير ناس...

يمكن لما أنزل مصر آخد (جرعة منشطة) ترجعنى (ميدو) بتاع زمان اللى كان نفسه يهج على أول طيارة...

Even lions! حب الأسود

A lion receives a visit from his rescuer in a South American zoo..and see how (he) greets him!


_______________________________________________________
_______________________________________________________
and on the other side of the world:
these two men bought this baby lion and they took care of him and loved him and when he grew up they decided to take him back to africa. after one year they went to visit him in Africa. take a look at how the lion met them

هذان الشابان إشتريا هذا الشبل من حديقة حيوان لندن فور ولادته أحباه كثيرا وأعتنيا به حتى كبر وبات الإحتفاظ بأسد أمرا مستحيلا في منزلهم الصغير بوسط المدينه فقررا إرساله إلى افريقيا حيث تم إطلاقه في موطنه الأصلي هناك .. وبعد عام كامل قررا السفر لافريقيا لرؤيته .. وهنا كان تصوير لقائهما مع الأسد

شاهد

ces deux hommes ont acheté ce lion de bébé et ils ont pris soin de lui et l'ont aimé et quand il a grandi ils ont décidé de le ramener à l'Afrique. après un an ils sont allés lui rendre visite en Afrique. jetez un coup d'oeil à la houe que le lion les a rencontrés

إيه الفرق بين مظاهرات مصر ومظاهرات لبنان؟

Now you know why young guys in Lebanon are so willing to demonstrate!

A picture from Gaza...

This photo is not a screen shot from an epic movie..It is real!

Farida Abdullah, 57 year old Palestinian mom who lost her entire family during Israeli attacks on Gaza, trying to save her farm from being destroyed by the Israeli army bulldozers. Israel claims that some Palestinian farms have been used by HAMAS to launch rockets attacking Israel.

كلام هيودينى فى داهية

كلام هيودينى فى داهية!

ممكن يكون اللي بيحصل الأيام دى مقدمة لثورة تصحيح إسلامى شاملة..هل ممكن بعد عشر سنوات من الآن نشوف إسلام تانى مختلف عن الإسلام اللى احنا اتربينا عليه من خطب الجمعة والشرائط الكاسيت وكتب عذاب القبر ونعيمه!.ـ..
الحقائق كلها بتؤكد ده...وثورة التكنولوجيا ..وأحداث 11 سبتمبر غيرت العالم سواء رضينا أو رفضنا...الضوء اتسلط على أفكارنا ومعتقداتنا وبعد ما عدينا مرحلة المراهقة الفكرية (أحنا ميه ميه ومش محتاجين تغيير) وصل بعض المفكريين الإسلاميين لنقطة مهمة جداً ومؤثرة فى مستقبل الفكر الإسلامى وهى : (لأ احنا فعلاً عندنا مشاكل كتيرة ونقط مش متزبطة فى فهمنا وممارستنا للإسلام) والمشكلة دى مش فى القرآن ولا فى السنة...المشكلة دى فى أفكار أجيال من علماء وناس من أزمان بعيدة وأفكارقبلية فسروا القرآن والأحاديث بطريقة تتناسب مع حياتهم القبلية والإجتماعية فى زمانهم..
ونرجع نقول إن الإسلام رسالة عالمية غير مرتبطة بزمان ولا مكان...طب إزاى ينفع نطبق فتاوى شيخ عاش فى اليمن من ألف سنة على مسلمين عايشين فى سويسرا سنة 2050...طبعا مش ممكن..والنتيجة تكون إن الإسلام ينحسر فى زاوية فى مسجد أو فى كتاب مهجور لا يمكن تطبيقه فى الحياة اللى احنا عايشنها...
المهم إن كان فى مجموعة أحاديث بتبشر بنزول (المهدى المنتظر) وآه من المهدى المنتظر...اعتقد ان المهدى المنتظر ده هو قمة الدراما الإسلامية اللى لو اتعملت فيلم هيكسب الأوسكار فهو قصة واحد من عامة الشعب منغمس فى الشهوات والملذات وفى يوم وليلة ليلة جميلة ربنا يهديه و يتحول لقائد مغوار يقود الأمة للنصر على اليهود ويعيد السلام والخير والعدل للأرض...يا سلام!!!! يعنى المسلمين يفضلوا مرمطون العالم ويصبروا لغاية ما المهدى المنتظر يبطل عربدة ويقرر إنه يبطل سجاير ويكون انسان جديد... والفكر ده على فكرة موجود فى كل الأديان ...فكرة المخلص ونصف بشر نصف إله ربع معزة الذى يأتى إلى الأرض ليحقق على أرض الواقع ما فعله أميتاب باتشان فى الأفلام الهندية!!...ـ
يمكن كلامى يكون صادم لكن أنا فضلت كاتم فى صدرى لغاية ما اتكلم علماء بجد مش حشاشين زى أمثالى...الأستاذ الدكتور طه جابر العلوانى..العالم الذى لا يلتفت إليه أحد وهو فى رأيي واحد من أعلم أهل الأرض بالإسلام فى وقتنا هذا ...قال فى حوار تاريخى..ليس هناك مهدى منتظر ولن يعود المسيح لأنه ببساطة يتنافى مع مبدأ ختم النبوة...الله الله عليك يا دكتورنا والله لو الفضائيات يدوك ربع اهتمام عمرو خالد لكان حالنا اتغير..لكن معلهش...التغيير مش بالساهل...مش بالساهل تغيير حاجات أصبحت فى فكر الناس زى العقيدة فى يوم وليلة حتى لو كانت ليلة جميلة!ـ
مش كده وبس..العلامة القرضاوى فجر قنبلة بمقال تعدد الأديان واللى قال فيه أنه يجب احترام عقائد الآخرين لأنه لو شاء الله لجعل الناس كلهم مسلمين...الله عليك يا شيخ وربنا يطول فى عمرك..
وأخيرا..تركيا مش عاجبها الكلام برضه...تركيا لقت فيه صحوة إسلامية وجيل أتاتورك بيودع الساحة لجيل الصحوة الإسلاميه...ققررت وزارة الشئون الدينية هناك إنها تراجع الأحاديث وتقيسها على القرآن واللى مش هيتوافق مش هيعترف بيه...محاولة جميلة لكن ياريت ياخدوا معاهم علماء عرب لأن رغماً عن الترك والعجم بشهادة التاريخ أن نصر الإسلام لا يأتى إلا (للأسف) من داخل العرب وبالأخص (للأسف) برضة من جيش وعقول مصرية مطعمة بخبرات من بقية الدول الإسلامية...
وللحديث بقية إذا لم يقم علي الحد
Medotv.blogspot.com

___

ماذا يمكن أن تشترى بـ 20 ألف جنيه مصرى؟

من خلال تصفحى لإعلانات مصرية وإعلانات أمريكية عن سيارات للبيع وحددت مبلغ عشرون ألف جنيه مصرى لشراء سيارة وجدت أن عندى خيار من كوستين:

الأول شراء عربية فيات 128 موديل 83 ركبها أجيال ورا أجيال من قبلى ورشه دواخل استعمل طبيب وممرضة...أو

بنفس المبلغ يمكننى شراء مرسيديس بنز موديل 86 وصرتها الحقيقية هنا والبياع موافق أن يهز المبلغ شويتين

فيلم زكى شان