بدون تعليق..فيلم أمريكى يبين الدور الحقيقى لأجهزة الأمن العربية

من غير ما اتكلم كتير
نفسى تتفرجوا على الفيلم ده
وتعرفوا إيه الدور الحقيقى للعصابات اللى حاكمة دولنا العربية
يعنى التسليم Rendition الفيلم إسمة
وهو مستوحى من قصة حقيقية حدثت لمهندس سورى
والفيلم يحكى حكاية مهندس مصرى الجنسية
يعيش فى أمريكا ومتزوج من أمريكية
ويوقعه قدره مع المخابرات الأمريكية التى تشتبه فى كونه على صلة بالإرهابيين
والتى تعطى المهمة القذرة (التعذيب) لأجهزة الأمن العربية الهمامة
مش هحرق الفيلم بس ياريت اللى يقدر يشوفه يشوفه
لإنه بيدى صورة أكبر لأهمية الأنظمة الحالية للإدارة الأمريكية
ويفهمك ليه أمريكا حلقت لأيمن نور بعد ما خرم ودانه
عشان نعرف إن احنا لازم نتحرك لقضية أكبر من مجرد أزمة أسعار
الناس دى حولت بلادنا لسجن كبير
يقدم خدماته الأمنيه لجميع بلاد العالم
وعلى فكرة حركة كفاية متصورة فى الموضوع وفيه مشهد متمثل لمظاهرة من كفاية
والأمن بيطحنهم
فيلم عميق..لازم نفكر فيه ونفهم
إن الموضوع أكبر من طابور عيش
اللى مابيفهمش أنجليزى كويس هيفهم أحداث الفيلم لإن نص كلامه بالعربى لإن أحداثه بتحصل فى المغرب
تفرج على إعلانه






وده لينك لموقع بيبث الفيلم كاملاً مجانا
http://www.watch-movies.net/movies/rendition/

الفضيحة...الفضيحة....الفضيحة...الفضيحة...الفضيحة...الفضيحة

الفضيحة......على سيناريو حريق القاهرة
قوات أمن مبارك تشعل النيران وتخرب المحلة لتوريط المعارضة

صورت عدسات النشطاء فى المحلة الكبرى لقطات نادرة لعناصر من جهاز أمن مبارك يقومون بالتخريب لتوريط المعارضة ولتكون ذريعة لشن حملة إعتقالات وإستخدام مفرط للقوة الغير مبررة
وكانت البرامج الحوارية التليفزيونية المروجة لسياسات الحزب الوطنى دأبت على نفى الشائعات التى تتدوالها المدونات عن دور مؤكد تلعبه قوات الأمن بالتعاون مع جيش من البلطجية وأرباب السوابق الذين يعملون لحساب الحكومة فى التصدى للمظاهرات والإنتخابات
وقد تمكن المدون محمود منير من تصوير ضباط أمن مركزى يقومون بتكسير زجاج سيارتهم المدرعة وفيها يقوم المجندون بضرب الزجاج بمؤخرة البندقية كما بقوم أحد الضباط بضرب الزجاج بالبيادة ..وكل ذلك على مرأى من بعض المواطنين الذين تجمعوا يراقبون فى ذهول قوات الأمن وهم يكسرون سيارتهم

من ناحية أخرى أكد الكثيرون من شهود العيان أن النية كانت مبيته من رجال الأمن لإصتناع مصادمات يشعلها بلطجية الحكومة لتوريط العمال المتظاهرين ولتحويل المظاهرة السلمية إلى معارك شوارع
وقد أكد أحد أصحاب أكبر سلسلة مطاعم فى المدينة والتى تعرضت للتخريب أنه شاهد رجال غرباء ليسوا من المحلة يوجهون مجموعات البلطجية
وسيناريو البلطجية هو سيناريو يستخدمه أمن الدولة فى كل انتخابات أو مظاهرات منذ فترة طويلة كما يستخدم الأمن الساقطات واللآتى لديهن ملفات فى بوليس الآداب لإرهاب السيدات فى لجان الإنتخاب النسائية

A New Era in Egypt: LIVE FREE OR DIE TRYING

Its A new Era in Egypt: Started April 6th 08

A New Era in Egypt: LIVE FREE OR DIE TRYING

We are NOT afraid anymore

If you put one of us in Jail

1000 of US will replace him in the streets

Its our country

and WE are taking it back

Because WE know that
The patriot's blood is the seed of Freedom's tree

So, dectator, look over you shoulder

Because April 6th 08 was only the start
and it WILL NOT be the end
All these pics was taken from the streets of Egypt on April 6th 08
The first Egyptian National general Strike

عجبت لمن لا يجد قوت يومه لما لايخرج على الناس شاهرا سيفه ابو زر الغفارى

اغضب فإن الله لم يخلق شعوباً تستكين

اغضب فإن الأرض تـُحنى رأسها للغاضبين

اغضب ستلقىَ الأرض بركاناً

ويغدو صوتك الدامي نشيد المُتعبين

إضراب 6 إبريل - أمل مصر فى وجود أمل

ما هى المشرحة ناقصة جثث

صباح الهبل والفشل!

كنت عاوز أركز فى اليومين دول على موضوع الإضراب فى مصر بس للأسف سفاهة بعض الفلسطينيين مخلتنيش أقدر أسكت
لقيت واحد أمريكي يمينى (صديقي اللدود) باعت لى حتة فيديو من تليفزيون الأقصى بتاع حماس
الكليب فاشل عن عرض للعرائس فيه طفل يتسلل للبيت الابيض ويقتل الرئيس بوش

والمصيبة إن الكليب موجه للأطفال
والمصيبة الأكبر إن الطفل حول البيت الأبيض لمسجد..إى والله...مسجد للمسلمين
وأنا مش عارف ليه الفلسطينين مصرين إنهم يفقدوا تعاطف الناس معاهم
مش كده وبس...دول بيخلوا الناس تكره الإسلام أكثر وأكثر
هو مين اللى قال إن المسلمين عاوزين (يفتحوا) أمريكا ويحولوا البيت الأبيض لمسجد
واللى حمار ومبيفهمش فى السياسة ولا الإعلام يفهم إن البيت الأبيض ده رمز وطنى محترم للشعب الأمريكى بكل طوائفه
ودى إهانة عظيمة ليهم إنك تقول إن احنا هنحول رمزكم الوطنى لمكان عبادة لينا
دى بالظبط كأن برنامج أطفال أمريكى ييجى يقول والله إحنا هنحول قصر عابدين لكنيسة وهنحول مجلس الشعب لمعبد يهودى
شوف هتضايق قد أيه
وأنا والله مقدر البهدلة اللى الفلسطينين فيها
بس لازم نعرف إن التليفزيون ده جهاز إعلامى
مهمته التعريف بالقضية ومحاولة حشد الدعم عن طريق الحقائق والعواطف
بالضبط زى اليهود ما بيعملوا..بهدوء وعقلانية
لإن التليفزيون حاجه والمقاومة المسلحة حاجة
ولكل مقام مقال
ثانياً: ليه نشوه نفسية الأطفال ببرامج رعب مش ترفيه
يعنى الواد الصغير عاوز يشوف فيلم كارتون ولا حاجه تنمى خياله
يشوف قتل وإحتلال
هى ناقصه كلاكيع
هتقولى بيربوهم على القضية
ماشى يا عم
أنا معاك
ربيهم على القضية بس مش بالشكل المشوه ده.
لما انت بتربيه على نبذ الإحتلال..ليه بتعلمه إن احتلال المسلمين لامريكا حاجة ميه ميه.
ثانيا فيه مليون طريقة لتربية الأولاد على القضية غير الهبل اللى غير مدروس ده
وأرجع أقول تانى
التليفزيون أداة إعلامية مش خطابات سياسية
ولكل مقام مقال يا بشر
لكن ليه..ما توروا الناس إن احنا أمة همج وعاوزين نحتل العالم
وبدل ما نشرح للناس قضية فلسطين ..نضيع وقتنا عشان نثبت إن احنا مش عاوزيين نحتل أمريكا!
ياعنى الفلسطينين بشوفهم هنا ما شاء الله فى أمريكا مبرطعين وأغنى ناس وأصحاب بيزنس ومحتكرين تجارة الخمور والسجاير ومزارع الخنازير فى ولايات كثيرة

ويملكوا نص بنزينات أمريكا
وعندهم عشرات المليونيرات فى شيكاغو
وعندهم أسرة عندها أكبر مزارع خنازير فى كل أمريكا
الفلسطينين من أغنى الجنسيات المهاجرة فى أمريكا وعايشين فى قصور وربنا يزيدهم يا سيدى..أهو كله من أجل (القضية)..القضية
ودى مش أسرار
واللى له قريب فى أمريكا يسأله
وكل جمعة عشروميت منظمة بتلم ملايين من مسلمى أمريكا عشان فلسطين.
يعنى الفلسطينين والحمد لله عايشين فى أمريكا أحسن من الأمريكان والحالة ميه ميه معاهم...ما ينفعش يعنى كانوا جابوا فريق عمل القناة العجيبة دى..وصرفوا عليهم شوية..ودخلوهم جامعة ولا حاجة تعلمهم اللى ينفع يتقال على العلن واللى لا يجب ذكرة
ليه المليونيرات الفلسطينين فى أمريكا واللى ممكن ينفقوا على بلد كاملة ما يصرفوش على ناس تتعلم الإعلام بجد

ومش مهم من فتح ولا من حماس...المهم ناس تتعلم صح وما تقدمش برامج سمك لبن تمر هندى
بدل ما كل واحد عبيط يقول كلام يضر صورة المسلمين فى العالم كله..مش الفلسطينيين بس
أرحمونا بقا..هيه ناقصة بيضان

أتفرج يا عم على الفيديو العجيب

______________________________________________________

Oh, what do you call it again: a movie! شخة خنزير هولندى

أولاً ده مش فيلم...دا شوية قص ولزق ممكن يعملهم أى عيل مالوش أصلاً أى علاقة بالسينما...ده كائن شاذ لا هو فيلم تسجيلى ولا روائى ولا فيلم أصلاً...
مش عارف ليه إحنا ليه لسه بنعمل للخنزير الهولندى قيمة وشيخ الأزهر اللى بيعتبر رمز إسلامي يتكلم عنه...ده شوية هرتله وصور متجمعة لا فيها فكر ولا رؤية وأحسن حاجه نعملها هو تجاهل الكلب اللى بيعوى ونقول لكل الخنازير : قل موتوا بغيظكم
14 دقيقة واحد حب فيهم يشتم الإسلام...طاب ما تسيبوه يشتم...وسيبوه خالص براحته..لإن النار لو مالقتش حاجة تكلها بتاكل نفسها
هنتظاهر ونجعر..هيقولوا عليه شهيد الحرية..وهنعمل دعاية لشخته ونسميها فيلم..ياجماعة خلينا أكبر من البقر الهولندى
إحنا حضارة 1400 سنة هيضرنا إيه لما خنزير هولندى يقول علينا متخلفين
كبر دماغك..وصدقنى كل اللى شافوا حتة البور بوينت دى اللى بيقولو عليها فيلم قالوا الموضع ما يستاهلش أساساً ان احنا نتكلم فيه
إتفرج وقولى إيه رأيك

أحنا اللى بنسب الرسول

أحنا اللى بنسب الرسول!
أيوه إحنا اللى بنسب الرسول مش الدنمارك ولا النرويج ولا حتى إسرائيل...إحنا اللى بتخلفنا ونظرتنا المحدودة للأشياء اللى بنسب الرسول وبنشهر بأشرف الخلق فى كل مكان...وقبل ما تقول إنى بحشش-وأنا حشاش ولا أنكر- لكن خليك معاي دقيقتين...إدينى مخك وسيبك من الحناجر اللى عمله تولول أربعة وعشرين ساعة على الرسول وهم اللى وكسونا ودنسوا إسم أشرف الخلق:
هديلك سيناريو: واحد رسام مغمور مالوش أى لازمة فى الحياة..عايش فى بلد مالهاش لازمة فى الحياة غير إنهم شوية جهلة بيحلبوا بقر وبيبيعوا جبنة!...المهم الرسام الغير مهم ده اتحذق وجاله إسهال من كتر الجبنة البيضة وشخ على ورقة رسمة مسيئة على النبى الكريم...والجريدة دى على أقصى حد بيقرأها عشر تلاف واحد...والصفحة اللى فيها الرسمة دى بيقراها قيمة ثلاثة آلاف من العشرة دول...والكاريكاتير ده..بيقراه حوالى ألف من التلاتة من العشرة...يعنى ألف واحد هيشوفوا رسمة مسيئة للنبى...أوكى..والموضوع خلص ونام ومات...ولا من شاف ولا من درى..
السيناريو التانى: نفس السيناريو بس زود عليه...شيخ فى مسجد فى الدنمارك ...كل شغلته فى الحياة إنه يصلى بالناس الجمعة وبقية الأسبوع فاضى ماورهوش شغلة عشان المسلمين فى الغرب شغالين ليل نهار ويدوب بيصلوا الجمعة بالعافية..الشيخ ده شاف الرسمة ولا حد قاله عليها لأن معظم شيوخنا أصلا لا يقرأون (الجرايد الكافرة) ومعظم شيوخ الغرب لا يفهمون ثقافة المجتمع اللى هما عايشين فيه وطول النهار بيتفرجوا على الجزيرة والعربية وقناة النيل للدرامل عشان يشوفوا تطورات مرض ماما نونة..
المهم الشيخ ده أعلنها نار وسنار وطلع يجرى يلف الدول العربية وكأنه بيجاهد فى سبيل الله ولا يحلوا الجهاد إلا فى الغرب اللى بيدفع بالدولار والدول العربية اللى بتدفع بالريال..إلا ما شفنا الشيخ ده رايح يعلم المسلمين فى كينيا ولا ساحل العاج ...المهم...الدنيا أتقلبت والمظاهرات قامت وهاتك يا مقاطعة وهاتك ياتكسير وحتى الحكومات ماشاء الله نزل عليها الإيمان فى يوم وليلة وسمحت للمظاهرات إنها تطلع وتكسر السفارات..وأهو الكل يسترزق..من أول الشيخ اللى بقاله قضية عالمية...لغاية الحكومات اللى عاوزة تصرف نظر الشعوب عن المصايب والإحتلال و التبعية والعمالة والتخلف..وكمان المغنين يعبوا شرايط وكلبات...وحتى الناس تطلع الكبت اللى هيا فيه وتنزل تصرخ فى الشوارع..يعنى الكل مستفيد..والكل هينام وضميره مرتاح لإنه عمل اللى عليه ووطلع (ميتينه) فى الجهاد...
إحنا اللى سبينا الرسول لما شهرنا صحيفة دنماركية حقيرة بغبائنا ومشاعرنا اللى مش فى محلها...إحنا اللى عملنا أحسن دعاية لرسام شخة درجة تالته وعملناه شهيد الحرية...إحنا اللى خلينا مهزئة النبى الكريم على كل محرك بحث عشان إحنا عالم نيجى فى الهايفة ونتصدر...
تمام بالظبط زى سلمان رشدى...كاتب تافه ومحدش كان يسمع عنه إلا لما إيران أهدرت دمه...وهاتك يا طباعة وهاتك يا تغطية إعلامية...والكتاب اللى كان اتباع منه خمسة ألاف نسخة...بشطارتنا أصبحت مبيعاته..خمسة مليون نسخة...عمرك شفت شعوب متخلفة بتدى أعدائها دعاية مجانية!..
عاوز تشوف شتيمة الرسول..أنا هاسمعك..فى القرآن...أيوه.. هتنح ليه...فى القران...تسمع شتيمة الرسول أكثر من مرة...القرآن سجل شتيمة الرسول فى آيات كثيرة..عشان يقول للمتخلفين أمثالنا..ميهمكمش لما يسبوا الرسول..دا شئ متوقع من الكفار...حصل وهيحصل وهيفضل يحصل طول مافيه حق وباطل..طب ما إحنا بنتعبد بقراية الآية اللى فيها وصف الكفار الرسول بإنه شاعر: أم يقولون شاعر نتربص به ريب المنون ، قل تربصوا فإني معكم من المتربصين.
وكمان قالوا مجنون: ويقولون أئنا لتاركوا ءالهتنا لشاعر مجنون
وكمان قالوا هو : وَمِنْهُمُ الَّذِينَ يُؤْذُونَ النَّبِيَّ وَيِقُولُونَ هُوَ أُذُنٌ قُلْ أُذُنُ خَيْرٍ لَّكُمْ يُؤْمِنُ بِاللّهِ وَيُؤْمِنُ لِلْمُؤْمِنِينَ وَرَحْمَةٌ لِّلَّذِينَ آمَنُواْ مِنكُمْ وَالَّذِينَ يُؤْذُونَ رَسُولَ اللّهِ لَهُمْ عَذَابٌ أَلِيمٌ
أكمل.لأ أسيبك أنت تسأل الشيخ حلاوة بتاع الجامع بتاعك ..لو أى حد ختم القران من الجلده للجلده هيعرف إن عشرات الآيات تسجل شتيمة الرسول.
عشرات الأمثلة والصفات موجودة فى القرآن وبنقراها كل يوم أطلقها الكفار على رسول الرحمة
طب لما القرآن سجل الكلام وموجود فى كتبنا ..ليه بتقوم قيامة الدنيا لما واحد تافه عمل ما أشار إليه القران..
المشكلة إن احنا أمة عاطفية ولا نفكر قبل أن نتحرك...يمكن مابنفكرش أساساً..دا اللى عنده مشكلة نفسية فى مصر بيقولوا عند فكر وكأن التفكير ده مرض نفسى..ياعم خلى البساط أحمدى وطالما الحكومة عاوزاناه نتظاهر ضد الدنمارك يالا بينا أهو ننفس عن نفسنا..وناخد ثواب الجهاد التظاهرى!

أنا نفسى شوفت استهزاء بالنبى فى برامج أمريكية كتيرة وعدت ومحدش خد باله منها...إنما لو كان الشيخ حلاوة خلص ماما نونة بدرى وشاف برنامج من البرامج دى كانت الدنيا اتقلبت ومقعدتش تانى..
وعلى سبيل المثال لا الحصر: على قناة أتش بى أوه: بيل ماهر كان وراه بانر مرسوم عليه الرسول صلى الله عليه وسلم لابس شورت وبيلعب ملاكمة مع المسيح..
وفى قناة الكوميدى سنترال: مانسيا قدم الرسل فى خناقة وكان منهم واحد بمثل الرسول..
عمرك سمعت عن أى واحدة من دول..طبعاً لأ..لأن شيخ حلاوة أمريكا كان لسه مخلصش ماما نونا نظراً لفرق التوقيت ...لإن أحسن حاجة تعملها لما الكلب يعوى...إنك تسيبه والقافلة تسير...إنما احنا فرملنا القافلة فى وسط الصحرا وقلنا لازم نتظاهر ونسمع كل القوافل إن الكلب ده عوى علينا!!
والرسول صلى الله عليه وسلم كان بيسمع شتيمته ومايردش لأن الرسول العظيم أعلى من إنه ينتصر لنفسة رب محمد هيرد على أعداء محمد بالقرآن..الرسول عمره ماحارب لإسمه ولا لسمعته حتى لما أتهموه فى شرفه فى حادثة الإفك...الرسول حارب عشان الأمة...عشان يحرر العبيد ...العبيد بأجسادهم..والعبيد بأفكارهم..
لو كنا هنتظاهر ونجعر يبقى أولى إن احنا نشوف خيبتنا الكبيرة..دا إحنا أمة عالة على كل الأمم..بنصنع لبان ومصاصات...وبنزرع كانتلوب بدل القمح..أحنا أمة عالة على العالم وحتى مشاكلنا الإجتماعية والسياسية مش لقيين لها حل...إحنا الأمة اللى الجمهوريات بتحول لملكيات..والفساد منتشر من الغفير لغاية الوزير...
إحنا أمة طوابير العيش و جلالة الملك وسمو الأمير..إحنا أمة الحدود والكفيل وتصاريح السفر..إحنا أمة أمن الدولة و المخابرات و أمن الرئاسة..أحنا أمة الوسايط والمحسوبيات ويا بخت من كان الوزير خاله...إحنا أمة عدم إحترام الوقت وصفر المونديال..إحنا أمة الفشل..والهزيمة النفسية والعسكرية..معلهش خلينى أقلب المواجع عشان نصحى من أفيون الشعوب اللى احنا بنتاعاطاه من صغيرنا لكبيرنا..
إحنا اللى بنسب الرسول لأن الرسول لو بعث تانى دلوقتى هيقولنا سحقا سحقاً...لا تملكون حتى قوت يومنا..ودولكم مصنفة من أفشل البلدان إدارياً فى العالم...وأراضيكم محتلة...وحكامك عملاء وخونة...ونصنكم جهلة ما بيعرفوش يفكوا الخط...
هو فيه إهانة للرسول أكتر من أننا ننسب الرسول لينا واحنا أفشل ناس فى العالم.
صلى الله عليك وسلم يارسول الله ...واعذرنى إنى بقول عن نفسى إنى من أتباعك! !

الحلم العربى يتحقق بجواز سفر أمريكى

الحلم العربى يتحقق بجواز سفر أمريكى

طلب منى الشغل إنى أحضر مؤتمر فى كاليفورنيا...قلت وماله...أهى فرصة الواحد يشوف أماكن وناس وجديدة...مرضتش اركب طيارة..ضربت فى دماغى فكرة مجنونة...قلت أما أجرب رحلة برية...من نيويورك لكاليفورنيا. ركبت الناقة وشرخت...بلاد تشيلنى وبلاد تحطنى...3 أيام على الطريق...سايق عربية متأجرة وهسلمها هناك وهأرجع بالطيارة...المسافة كانت ألفين وثمانمية ميل..يعنى أربعة آلاف وخمسمائة كيلو متر...يعنى نفس المسافة لو سقت من المغرب لغاية بغداد...

نفس المسافة لو ركبت عربية من المغرب وعديت على الجزائر وليبيا ومصر وفلسطين ولبنان والأردن وسرية وتوصل لبغداد..

نفس المسافة اللى تقطع فيها معظم الدول العربية سقتها هنا...ولاية تشيلنى وولاية تحطنى...ما بقفش إلا إنى أمون بنزين أو آكل أو فندق عشان أنام...ثلاثة أيام بلياليهم بالشكل ده...محدش وقفنى وقاللى (رخصك يا ولا) ولا حدود قالت لى فين جوازك ولا داخل الولاية دى تعمل إيه..

كل المسافة دى و النظام نفس النظام والعملة نفس العملة والتليفون على نفس الشبكة و الناس نفس الناس....

تخيل للحظة إنك تطلع الرحلة دى...تتعشى فى الجزائر وتفطر فى ليبيا و تتعشى فى مصر..وتعدى على كل البلاد دى...وقف التخيل ..لأنه مستحيل...لأنك هتلتطع على الحدود بالأيام على بوابة كل بلد لغاية ما يسألوا عنك ويتفضلوا عليك ويدوك فيزا...الحلم العربى بإنك تلف كل الدول العربية حلم مستحيل...خلوه مستحيل بمعاهدة سايكس بيكو واللى طار فيها واحد خنزير انجليزى بطيارة فوق دولتنا الواحدة ورسم الخنزير حدود خدناها إحنا كأنها قرآن لا يمكن تغييرة...

ليه فيه حدود بين مصر والسودان وإيه سوريا وإيه لبنان مش دى بلاد الشام وإيه ليبيا وإيه الجزائر...وإيه الحدود اللى عمله زى التشوهات فى جسم واحده كانت فى يوم بنت عفية وجميلة...

لى واحد زميلى دكتور فلسطينى...عيلته هاجرت الأردن واتعلم طب فى سوريا...يعنى كان لازم يتعامل مع أوسخ تلات حدود فى المنطقة: وكل كان كل مرة يزورأهله فى الأردن فى أجازة الكلية...كان الأمن الأردنى يستضيفه ليلة ولا ليلتين قبل ما يسمح له بالدخول...حكالى مرة إن ظابط كان بيحقق معاه ويطمن انه محصلوش غسيل مخ فى سوريا ولا آمن بشعار(أمة واحدة ذات رسالة خالدة) وسأله الظابط أوعى تكون من بتوع الوحدة العربية اللى بيقولوا هييجى يوم تفطر فى فلسطين و تتغدى فى الأردن وتتعشى فى مصر... إنت عارف إن ده مستحيل...فرد عليه زميلى الدكتور: ده ممكن جدا لو معاك جواز سفر أمريكانى!...

لو أنت أمريكانى الحدود تتفتح ادامك من غير فيزا...ولو انت عربى محتاج كفيل!!!

أيه اللى جمع الشامى على المغربى فى أمريكا وخلاهم يتحدوا...بيض على سود على عرب على هنود على مكسيكان...ديانات مختلفة وجنسيات مختلفة وبلد واحدة...

واحنا جنس واحد ودين واحد و بلاد مختلفة!

أنا مش ناصرى ولا بعثى و باكره سنسفيل جمال عبد الناصر..بس اللى خلى أوروبا تتوحد وأمريكا تتوحد ...هو يعنى احنا اللى شاخخ علينا الكلب؟

سنة سادسة غربة

سنة سادسة غربة

بقالي ست سنين بعيد عن مصر!..ست سنين مشفتش فيهم محل فول وطعمية ولا عديت على طابور عيش...ست سنين مشفتش حد (مدلدل) السبت وبينادى على بياع راكب حمار يديله كيلوبامية..مشفتش غسيل منشور على حبال البلكونات ولا أتوبسات حمره...ست سنين مشفتش شباب بيشيشوا وبيلعبوا (استميشن) على قهوة.مشفتش عيال مزوغة من المدرسة عشان يعاكسوا بنات دبلوم التجارة على الناصية..ست سنين مشفتش فيها القناة الأولى وتليفزيون صفوت الغير شريف...ست سنين ما وقفش بيا التاكسى ساعتين فى الشارع عشان فى مظاهرة فى جامعة عين شمس...ست سنين مفيش ظابط وقفنى فى لجنة وقالى رخصك .ست سنين متسرقس فيهم (الكوتشى) بتاعى وأنا بصلى فى عمرو بن العاص ورا محمد جبريل عشان أروح فى مترو الأنفاق لابش شبشب زنوبة...

ست سنين مسمعتش خناقة الآذان بين العشر (زوايا) اللى حوالين بيتى و لا (جعير) مكروفونات بياعين بطاطين المحلة على عربيات النص نقل...ست سنين مسمعتش صوت البياعين وهما بيدلوعوا الخضار (مجنونة يا قوطة وياعنب المزارع يا متغذى)!

ست سنين مقرتش أهرام الجمعة ولا جرايد الحكومة...ست سنين عدوا كأنهم ست ساعات...

كل مرة أفكر انزل أزور مصر ألاقى مليون شغلانه وشغلانه وأقول لنفسى ..خلاص إن شاء الله السنة الجاية..وكأن فى حاجة فى عقلى الباطن بتسوف وتسوف...

الحاجات اللى كانت خنقانى فى مصر هى نفسها الحاجات اللى وحشانى دلوقت..الحاجات اللى خلتنى أعد الأيام عشان أهج من البلد هى نفسها الحاجات اللى بفتكرها دلوقت واضحك..اضحك بجد..اضحك ضحكة (عميقة) من جوه..ضحكة متضحكتهاش من ست سنين....مش عارف هل لإنى كبرت ولا لإنى اتطحنت فى أمريكا وعرفت إن فى حاجات فى الدنيا أهم من الشوارع النضيفة والحياة المتزوقة..

الحياة فى أمريكا زى المانيكان اللى فى البترينة..حلوة ومتزوقه بس ما فيهاش روح...أكلة جميلة من غير ملح...جنة من غير ناس...

يمكن لما أنزل مصر آخد (جرعة منشطة) ترجعنى (ميدو) بتاع زمان اللى كان نفسه يهج على أول طيارة...